Fólk í framboði

Var að enda við að horfa á kynningu á stjórnmálaflokkunum, það er fyrstu tveimur þáttunum sem sýndir verða fyrir kosningarnar til að kynna fyrir hvað flokkarnir standa, ágætir þættir svo sem en misgóðir.

Þáttur VG var um margt áhugaverður með svona soldið heimatilbúnum hughrifum, það er maður átti að fá á tilfinninguna að ekki væri um auglýsingu fyrir flokkinn að ræða heldur verk áhugamanna um stefnu og störf flokksins og heppnaðist það bara nokkuð vel. Þar voru tekin viðtöl við 4 frambjóðendur ofarlega á listum VG og gaman að hlusta á þau kynna sín mál, en eitt þótti mér miður, eins og mér finnst mikið koma til Katrínar Jakobsdóttur sem frambjóðanda finst mér því miður að hún var ekki alveg nógu skýrmælt í þessum þætti. :-( Ekki að hún hafi ekki komið málefnum sínum á framfæri á skýran og góðan hátt eins og hennar er von og vísa heldur það að framburður okkar ástkæra og ylhýra. Ef einhver sem les þetta þekkir hana má viðkomandi endilega koma því til skila að það sé skemmtilegra að heyra hana tala þegar hún ber öll atkvæði orðanna fram.

Þáttur Sjálfstæðisflokksins aftur á móti einum of "framleiddur", byrjaði á rosalegri teiknimynd þar sem þulur fór yfir stefnu flokksins og hverju hann hefur áorkað í stjórnartíð sinni og undir dunaði taktföst tónlist, mjög vel gert og allt það. Síðan var stokkið beint í viðtal við Geir H. Haarde, þetta viðtal var að mínu mati ekki nógu gott, flæðið í viðtalinu var engan vegin nógu smurt, spyrjandinn hefur annað hvort ekki verið alveg nógu vel þjálfaður eða það sem mér finnst sennilegra að þarna hafi verið um að ræða að einungis hafi verið ein myndatökuvél á staðnum og til að ná klippingum milli andlits spyrjandans og Geirs hafi fyrst verið teknar upp allar spurningarnar, myndavélin svo færð og svörin tekin upp.

Að því leyti tókst VG nú talsvert betur upp, viðtölin voru meira lifandi og betra flæði í þeim. Nú er bara að sjá hvort maður nennir að horfa á þætti hinna flokkanna, allavega frekar ósennilegt að ég nenni að horfa á kynningarþætti Framsóknar- og Ný-framsóknar- manna.

P.S. 7 dagar til stefnu áður en allt þarf að vera tilbúið :P

Sannfæring mín efld enn frekar :D

Já ég tók próf á netinu sem á að útlista með nokkrum einföldum spurningum hvað maður á að kjósa í komandi alþingiskosningum. Niðurstaðan kom mér svo sem ekki á óvart nema að því leyti að maskínan vildi meina að það hentaði mér jafn vel að kjósa Vinstri græna og Samfylkinguna sem er bara engan vegin rétt.

Ný-framsóknarstefna Samfylkingarinnar gengur aðallega út á að veiða atkvæði þeirra sem kjósa eftir því hvað er vinsælt að tala um þann daginn og slíkur rekstur á stjórnmálum virkar ekki til lengri tíma.

Einnig kom mér á óvart að maskínan vildi meina að í næst efsta sæti hjá mér ætti að vera Íslandshreyfingin, en það passar ekki alveg við þær skoðanir sem ég hef myndað mér sjálfur en að öðru leyti verð ég að segja að þessi vél er nokkuð vel útfærð hvað mínar skoðanir varðar.

Alltaf gaman að svona framtaki til að lífga upp á lífið og til að treysta óbilandi trú manns á því að maður sé að velja rétt samkvæmt sinni sannfæringu :D

Annars er það eitt sem mér finnst miður skemmtilegt í þessu þjóðfélagi hvað varðar kosningar og það er að fólk sem hefur ekki skoðun skuli frekar sleppa að fara á kjörstað heldur en að skila inn auðum seðlum, (sem reyndar eru taldir með ógildum en það er efni í allt aðra og lengri umræðu) það er nefnilega lýðræðisleg skylda hvers þegns að taka þátt í vali á nýrri stjórn hvort sem það er með því að skila auðu eða kjósa rétt og hér er rétt að sjálfsögðu það sem passar manns eigin skoðunum best.

Góða skemmtun og munið að kjósa um næstu helgi